Bügenge törek waqıtlı matbuğatında kiçä Elazığda barlıqqa kilgän häm 51 keşeneñ ülemenä säbäp bulğan 6 zurlığındağı cirteträw belan bäyle xäbärlärne yaqtırtuğa kiñ urın birelä.

“Haber Türk” gazetı kiçä irtänge 4 säğat 32 minuttta barlıqqa kilgän 6 zurlığındağı cirteträwneñ Elazığnıñ 5 awılına zur zıyan kiterüe turında yaza. Gazet cirteträwdän soñ töbäktä 110 iyärçen cirteträw yäşänüen belderä.

“Star” gazetı da tema belän bayläneşle xäbärendä Elazığnıñ Karakoçan ilçäsendä barlıqqa kilgän cirteträwnen yañğır häm qar yawu näticäsendä yomşarğan kirpeç yortlarnı tufraq öyemenä äyländerüen citkerä. Gazet belgeçlärneñ Gaiti, Yaponiya häm Çilidağı cirteträwlärneñ Elazığdağı zilzilä belän turıdan –turı bäyläneşe bulmawı turında äytüen uquçıları belän urtaqlaşa.

“Zaman” gazetı “Törkiyä yärdämgä aşıqtı” isemle xäbärendä Elazığda yäşängän cirteträwdän soñ däwlätneñ barlıq mömkinleklärne qullanıp eşkä kereşüe, ictimağıy oyışmalar , yärdäm oyışmaları , Sälamätlek saqlaw ministrlığınıñ barlıq aşığıç yärdäm maşinaları häm boralaqlarınıñ yärdämgä aşığuı turında yaza.

“Cumhuriyet” gazetı 8 nçe mart Xalıqara xatın –qızlar köneneñ İstanbulda törle çaralar yärdämendä qotlanuın häm xatın –qızlarnıñ 8 nçe mart könen räsmi yal köne buluın taläp itülären citkerä. Gazet şulay uq xatın –qızlarnıñ belem aluda forsat tiñdäşlege häm säyäsättä aktiv rol başqarırğa teläwlärenä işarät itä.

“Vatan” gazetı “Awrupa Berlege üz IMFsen qoraçaq” isemle xäbärendä Gretsiyäneñ könnän –kön awırlaşa baruçı burıç probleması säbäbe belän Xalıqara valyuta fondı IMFneñ yevro töbägenä qatışuın telämäwçe Awrupa Berlegeneñ üz IMFsen qorunı kön tärtibenä quyuı turında yaza.

“Haber Türk” gazetı mädäniyat xäbärlären yaqtırtuçı bitendä Oscar bülakläreneñ iyälärenä tapşırıluın häm beryulı 6 tarmaqta büläkkä layıq bulğan Kathryn Bigelownıñ Oscarğa iyä bulğan berençe xatın –qız rejisser bularaq tarixqa kerüen citkerä.