Ukraina tarixında yaña ber säxifä açıla

Däwlät başlığı saylawlarınıñ ikençe turınıñ ciñüçese, räsmi bulmağan berençe näticälärgä kürä, urıs yaqlı oppozitsiya liderı Viktor Yanukoviç.

Tawışlarnıñ 95%ınnan kübräge sanalğan Ukrainada 48,23% tawış alğan Viktor Yanukoviç ciñüen iğlan itte.

Üzäk saylaw komissiyäse bastırğan näticälärgä kürä, Yanukoviçneñ ikençe turdağı köndäşe Premyer-ministr Yulia Timoşenko isä 46,14% tawış aldı.

Yanukoviç televideniye aşa urısça yasağan çığışında, ciñüen iğlan itep, il tarixında yaña ber säxifä açıluın äytte.

Premyer-ministr Timoşenkonıñ wazifasınnan kitüe zarurlığın belderüçe Yanukoviç Ukraina xalqınıñ ışanıçın qazanu öçen tırışaçağın häm iqtisadi krizisnı xäl itü öçen kiräkle reformalarnı ütkäräçägen assızıqlap äytep uzdı.

Timoşenkonıñ saylaw kampanyasın alıp baruçılar isä, xärämläşüneñ buluın alğa sörep, näticägä qarşı töşte.